ناصر خميس ضو العصر كلمات

ضو العصر كلمات

مريت يابو غنيم ذيك المراسيم

مدهال بدو باقي له مواري

وقفت به ساعه ودمعي مرازيم

خانت بي العبره وجتني طواري

شفت المكان الي بقاله معاليم

تبني على داره هبوب الذواري

وقفت به تايه من العقل ومهيم

ودي ابرد خاطري بالعباري

لامن ذكرت اللي مضى يامغانيم

يفوح صدري مثل فوح الغواري

كانه على كبدي تعرقا المياسيم

من يوم شفته وازرق الدمع جاري

مدهال بدو يتبعون المجاهيم

في شفها ترعي قفار البراري

ياما رعوها بين شق وخراريم

وياماانتقوها مع وسيع العواري

ميعادهم ضو براس المراجيم

قدم اسود تحضاه بيض العذاري

للماو بطرافه صياح وتناغيم

يفرح به الهشال عقب المساري

في ربعته تلقى فعول الشغاميم

كل ابلج لطيب رافي وضاري

ياماحلا ضو العصر والسما غيم

وصفر تمرق من حقوق الخباري

في خايع فيه الجوازي ملازيم

وراع الوحش يلقا ثري الحباري

كني بخيال وحلم والا تواهيم

تجريبي الايام ماني بداري

دار الزمان وشد من عاده مقيم

ماعاد باقي له على القاع طاري

هذي هي الدنيا زروع وصواريم

سبحان من يعلم بغيب الجواري

هل انت من عشاق ناصر خميس ؟ اذن انشر هذه الاغنية واعكس روعة احساسك وذوقك