اخر تحديث : 02:22:42 14-05-2023
يا طيب العشره
محمد الرشيدي
ألا يالله ياللي تحت هيبة سلطنتك أسلمت
لك المسلم يسبح لك بحمدك وإلك الإسلامي
احمدك وأشكرك وأثني عليك بما علي انعمت
وزدني في وفا بر العشير ووصل الأرحامي
ولجك الفجر ياليل الذهول اللي علي أظلمت
بعرضك واقع الماضي عليه عرض الأفلامي
وولهتك يالنديم اللي على صافي وفاك أضرمت
بصفحة ذكريات العام واللي من ورى العامي
بعد تقرير مشوار التجارب نجحك وأجزمت
بأن السيف سيفي والعصا والمحزم حزامي
عطتني عزلة إخلاصي معك نسيان من نادمت
كتبتك وانطوت صحفي عليك وجفت أقلامي
أباهي لا أبالي وأتبسيط كل ما قدمت
أشب النار قدام العرب وأشيد خيامي
نهاري حر شمسه يستحي منها لسان الشمت
وليلي ترجم نجومه ملامة كل من لامي
على ضو الكلام اللي كشف عنا ستار الصمت
وعرفت ان به وجيه باليمن ووجيه بالشامي
احسب انك تيمم باتجاهي وين ما يممت
اثر لا انته ورايه بالطريق ولا أنت قدامي
وكثر ماحن صدري للونيس وكثر ما درهمت
فجر صدري حنيني وأتعب الأقدام درهامي
عيون الصد وعيون التجافي حول مهما اكرمت
تشوف المجتهد كسلان والبناي هدامي
مصيبة لا تردت قيمتك في عين من قيمت
يشوفك بالسهل وانته تشوفه بالسما السامي
مادام ان جانبي شام لجنابك وانت عني شمت
كثر خيرك وانا لانيب لا جايع ولا ضامي
اشوف انه علي واجب اليا مريتكم سلمت
مرور كرام تربطها الكرامة عند الاكرامي
على شان الخفوق اللي على عرشه قعدت وقمت
وحجب عنك الدجا لين اشرقت لك بيض الأيامي
ختام السالفة يا طيب العشرة كرمت ودمت
هذا حقك علي وحق هقواتي على أوهامي
مصير الوقت يشرح لك ظروفه لاو غفلت ونمت
يصحيك الزمان اللي يصحي كل من نامي
وتعرفني لمنها ضاعت اوهامك بمن وهمت
وعرفت الفرق في حب الخشوم وحب الأقدامي
معلومات الاغنية
كلمات
سعد بن جدلان
رحمة الله
تصميم
سند SANAD
| تصنيف الاغنية | اغاني سعودية |
| اسم الاغنية | يا طيب العشره |
| اسم المطرب | محمد الرشيدي |
| كلمات الاغنية | سعد بن جدلان |
| الاغنية من الحان | محمد الرشيدي |